Tuesday, July 8, 2014

The Lion And The Mouse - A Friendship Story In Hindi

Kafi samay pehle ek bahut hi sundar jangal hua karta tha. Jaha ek Chuha(Mouse) Sher(Lion) ki gufa ke paas rehta tha. Chuha bahut hi shaitan tha aur humesha koi na koi shaitani karta rehta tha. Chuha aksar Sher ki gufa me jaya karta aur waha sara din khelta rehta. Ek din jab kafi garmi thi aur lagbhag jungle ka har ek janvar aaram kar raha tha, Chuhe ko nayi shaitani sujhi. Chuha Sher ki gufa me gaya aur waha khelne laga.

Har janvar ki tarah us garam din me Sher bhi apni gufa me aaram kar raha. Lekin Chuha kaha manne wala tha use to nayi shaitani karni thi. Khelte khelte Chuha Sher ke upar chad gaya kyuki Sher gahri neend me tha to wo jaga nahi, ye dekh kar Chuhe ki himmat aur badh gayi aur wo Sher ke upar sir se lekar pair tak kudne laga. Kabhi Chuha sher ke sir par kudta to kabhi uski pooch par latakta, Chuhe ko aisa karne me bahut maja aa raha tha. Chuhe ke baar baar Sher ke upar kudne se aakhir kaar Sher ki neend khul gayi, aur wo kafi gusse me utha aur jor se dahada.

Chuha Sher ki gusse bhari dahad sun kar dar gaya. Sher ne dekha ki wahin bagal me wo Chuha baitha hai jisne use jagaya hai. Sher ne bina der kiye Chuhe ko apne panje me daboch liya. Bechara Chuha ab kar bhi kya sakta tha, dar ke mare uska bura haal tha. Tabhi Sher bola to tu hai jisne meri neend kharab ki, tu janta nahi mai is jungle ka raja hu. Ab tujhe iski saja milegi, mai tujhe apne panje se masal dunga. Ye sun kar Chuha kanpne laga aur Sher se mafi mangne laga.

Chuhe ne kaha ki mujhe maaf kar dijiye mujhse galati ho gayi, mujhe mat mariye aage se aisa nahi hoga. Lekin Sher to bahut hi gusse me tha Sher ne kaha nahi agar aaj maine tujhe chor diya to is jungle ke dusre janvar bhi kal aisa kar sakte hai. Chuhe ne phir apni jaan ki bheekh mangi aur kaha ki mujhe maaf kar dijiye, agar aaj aap meri jaan baksh dete hai to mai kabhi na kabhi aapke is ehsaan ka badla jaroor chukaunga.

Sher ye sun kar jor jor se hasne laga aur bola tujh jaisa chota Chuha bhala mere liye kar hi kya sakta hai. Chuhe ne phir kaha aap mujhe maaf kar dijiye, agar aap aaj mujhe maaf kar denge to bhavishya me mujhse jo bhi ban padega mai aap ke liye karunga. Sher ko Chuhe par hansi to aayi lekin Chuhe ki baaton me use sacchai bhi nazar aayi, isliye Sher ne usse kaha theek hai mai tujhe maaf karta hu par aage se dhyan rakhna aisi galati dobara na ho. Chuha ki jan me jaan aayi aur usne Sher ka shukriyada kiya aur waha se chala gaya. Aise hi kuch din beet gaye, na to ab Chuha utni shaitani karta aur na hi usne Sher ko phir kabhi dobara paresaan kiya.

Ek din jungle me ek Shikari (hunter) aaya aur usne Sher ko pakadne ke liye jaal bichaya. Badkismati se Sher us jaal me fans gaya, Sher ne jaal se nikalne ki bahut koshish ki lekin uski saari koshish naakam ho gayi. Wo jitna jor lagata utna hi jaal me fansta jata. Sher dukhi hokar jor jor se dahadne laga. Sher ki dahaad me dukh aur paresani saaf pata chal rahi thi. Tabhi Chuhe ko Sher ki awaaj sunayi di, Sher ki awaaj sunte hi Chuha samajh gaya ki ye to wahi Sher hai jisne kuch din pehle uski jaan bakshi thi.

Kyuki Sher ki awaaj me dukh saaf jhalak raha tha isliye Chuha ko ye samajhte der nahi lagi ki Sher mushibat me hai aur Chuha turant ye pata lagane nikal gaya ki aakhir manjara hai kya. Chuha jab Sher ki gufa ke paas pahucha to usne dekha ki paas hi me Sher Shikari ke jaal me fansa hua hai. Chuhe ko Sher ki ye halat dekh kar kafi dukh hua aur wo Sher ki madad karne ke liye uske paas pahuch gaya.

Chuhe ko apni taraf aate dekh Sher ko kafi rahat mili. Chuha Sher ke paas jakar bola ki aap chinta mat karo mai is jaal ko kaat deta hu, Shikari ke aane se pehle aap aazaad honge. Chuhe ne ek pal ki bhi der na karte hue apne tez danton se jaal ko kantna suru kiya. Aur dekhte hi dekhte usne poora jaal kaat diya aur Sher aazaad ho gaya. Sher bahut khus hua aur use apni galati ka ehsaas hua. Usne Chuhe ka shukriyada kiya aur phir wo dono kafi acche dost ban gaye aur khusi khusi jungle me rehne lage.

Kabhi bhi kisi ko kamjor nahi samajhna chahiye. Najane kab kon aap ke kaan aa jaye.
Saccha dost wahi hota hai jo mushibat ke waqt aapke kaam aaye.