Saturday, June 28, 2014

The Perfect Heart - An Inspirational Story In Hindi

Ek subah ek jawan ladka ek chote se town ke beecho beech jakar khada ho gaya aur sabhi logo se zor zor se chilla kar kehne laga. Dekho mera dil sabse sundar hai, isse accha dil agar kisi ka ho to mere samne aaye. Dekhte hi dekhte wahan logo ki bheed jutne lagi or sabhi ne us naujawan ka dil dekha wo sach me bahut hi sundar tha jisme ek bhi nisaan nahi tha or wo bahut hi acchi tarah se dhadak bhi raha tha.

Saare town wale uski baat se sehmat the or sabhi uske perfect (bina kisi kami wala) dil ki tareef kar rahe the. Naujawan ladka bhi ye dekh kar kafi khush tha or apne dil ki sundarta ke liye garv bhi mehsoos kar raha tha. Fir ladka khusi me aur tez chillaya
"Hai na mera dil sabse sundar,sabse behtar, agar kisi ka dil mujhse sundar ho to wo samne aa sakta hai".
Tabhi bheed me se ek bujurg(old man) aadmi aaya or kehne laga
" Tumhara dil sundar jaroor hai par mere dil ki tarah na hi to ye sundar hai or na hi perfect".
Saari bheed jo waha jama thi or sath hi ladke ne us bujurg ki taraf dekha. Sabki nigahein us bujurg ke dil ki taraf thi jo ki bahut tezi se dhadak raha tha aur usme kafi sare nisaan or gaddhe bhi the. Uske dil me se kuch hisse gayab the jinki wajah se gaddhe bane hue the or kuch gaddho me kuch tukde bhare hue the jo ki theek se un gaddho me fit nahi ho rahe the. Dil me kafi sare nissan or darare bhi thi jo ki kafi bhaddi dikh rahe the.Waha khade sabhi log soch me pad gaye ki aakhir ye aisa keh bhi kaise sakta hai ki iska dil sabse sundar hai. Iske dil or ladke ke dil ka to koi muqabla hi nahi hai.

Tabhi bheed me se naujawaan ladka nikal kar bahar aaya aur us bujurg ke dil ko dekh kar hasne laga aur bola aap majak kar rahe ho na. Apne dil ko dekhiye aur mere dil ko dekhiye mera perfect hai aur aapka to nissano or gaddho se bhara hua hai, to bhala ye mere jaisa perfect kaise ho sakta hai?- ladke ne garv se kaha.

Bujurg aadmi ne haan me jawab diya aur bola tumhara dil perfect dikhta jaroor hai lekin perfect hai nahi. Ye jo tum mere dil me darare dekh rahe ho ye unki di huyi hai jinhe maine apna pyaar diya. Jab bhi mujhe koi accha insaan mila maine use apne dil ka ek tukda diya aur kafi baar un logon ne bhi mujhe apne dil ke tukde diye jo maine apne dil ki un khali jagaho me bhar liye jo unko apne dil ka tukda dete waqt khali ho gayi thi. Halanki ye tukde mere dil me theek se fit nahi hote hai kyuki kabhi kisi ne mujhe mere diye huye tukde se bade tukde diye or kabhi chote. Lekin mujhe fir bhi mai in tukdo ke sath kafi khushi or garv mehsus karta hu kyuki ye mujhe un logon ki yaad dilate rehte hai jinke sath main apna pyaar banta.

Tum jo ye khali gaddhe dekh rahe ho ye unki wajah se hai jinhe maine apne dil ke tukde diye par unhone mujhe apne dil ke tukde wapas nahi kiye. Mujhe is baat ka dukh nahi hai ki un logon ne mujhe apne dil ke tukde wapas nahi diye balki ye mujhe ye batate hai ki pyaar ka matlab hi jokhim uthana hota hai. Agar pyar wapas mil gaya to theek nahi to dil me aise hi khali gaddhe reh jate hai, jo dard to karte hai par hume humesha unki yaad dilate rehte hai ki humne kabhi unhe pyaar kiya tha. Mai to aaj bhi ummeed karta hu ki shayad kabhi wo mujhe apne dil ka tukda denge jo mai apne dil ke khali jagaho me bhar sakunga.

To ab tumhe kya lagta hai, kya tumhara dil sabse sundar hai ?,  kya tum samjhe ki sacchi khubsoorati kya hai ?

Naujawaan ladka chupchap khada tha or uski aankhon se aansu beh rahe the jo ki uske galon se hote hue zameen par gir rahe the. Fir wo ladka us bujurg ki taraf badha or use jor se gale lagaya, aur fir usne apne dil se ek tukda nikala or us bujurg ko diya. Bujurg ne uske dil ke tukde ko liya or apne dil me laga liya aur phir khud ke dil se ek tukda nikala or us naujawaan ladke ko diya taki wo apne dil ke us ghau ko bhar sake jo ki apne dil ka tukda nikalne ki wajah se bana tha. Ladke ne wo tukda liya or apne dil ke us khali hisse me bhar liya, wo theek se fit to nahi hua par uska ghau bharne ke liye kafi tha.

Phir ladke ne apne dil ki taraf dekha ab wo perfect nahi dikh raha tha balki usme se khoon nikal raha tha par fir bhi na jane kyu ab use apna dil pehle se accha lag raha tha. Fir dono log apne apne raste chale gaye.
Hume hamesha apna pyaar sabke sath bantna chahiye, wo log kitne badnaseeb hote hai jo apni poori zindagi apne poore dil ke sath guzar dete hai.