Saturday, June 28, 2014

A Beautiful Love Story In Hindi

Ek ladka har roj subah mandir jaya karta tha, ek din use mandir me ek khubsoorat si ladki dikhi. Ladke ko use dekhte hi pyar ho gaya. Lekin usne us ladki ko pehle kabhi mandir aate nahi dekha tha or na hi kahin aas paas dekha tha. Wo man hi man soch raha tha na jane kab is ladki se dobara mulakaat hogi, lekin kyuki ladke ko use dekhte hi pyaar ho gaya tha wo agli subah jaldi utha or naha kar mandir pahuch gaya. Is umeed me ki shayad aaj wo fir aaye or tabhi ladke ki kismat ne uska sath diya, ladki dobara mandir aayi.

Aaj ladka koi mauka nahi chodna chahta tha to wo uska peecha karne laga or peecha karte karte us ladki ke ghar tak pahuch gaya. Wo ye dekh kar aur bhi khush hua ki wo ladki is sahar me nayi aayi thi or uske ghar se sirf kuch hi doori par rehti hai.

Ab kya tha ladka roj uske ghar ke aas paas chakkar lagane laga, roj time se mandir jane laga. Kyuki ladki use roj mandir aate dekha karti or uske ghar ke paas se bhi guzarte dekhti thi isliye kuch hi dino me unki thodi bol chal suru ho gayi. Aur dekhte hi dekhte wo acche dost ban gaye. Unki dosti kayi dino tak chali par ladka to use pyar karta tha to ab wo use propose karna chahta tha, halanki ye baat ladki bhi samajhne lagi thi or wo use mana bhi karna chahti thi par kyuki wo acche dost the to wo uska dil nahi todna chahti thi.

Lekin ek din ladke se raha nahi gaya or wo poori himmat bandh kar ladki ke paas pahucha aur use ek ring gift ki, to ladki ne poocha ye kya hai? Ladke ne jawab diya mai tumse pyaar karta hoon aur tumhare liye kuch bhi kar sakta hoon. Yaha tak ki mai tumhare liye jaan bhi de sakta hu. Ladki to use suru se hi mana karna chahti thi lekin wo use mana nahi kar paa rahi thi. Lekin aaj uske paas bahana bhi tha mandir ke bagal me ek nadi thi ladki ne ladke ki taraf dekh kar kaha ki tum mere liye kuch bhi kar sakte ho.

Ladke ne haan me jawab diya, ushi waqt ladki ne ladke ki di hui ring ko hath me liya aur nadi me fenk diya aur ladke se kaha ki jao mere liye wo ring dhoond kar lao (ladki ye janti thi ki ladka tairna janta hai or ye bhi janti thi ki nadi itni gehri hai ki wo kabhi us ring ko nahi dhoond payega). Ladke ne turant pani me chalang laga di, ladke ne ring ko dhoondne ki bahut koshish ki lekin wo use dhoond nahi paya aur aakhir kar thak haar kar wo pani se bahar nikal aaya or ladki se sorry kaha ki wo ring nahi dhoond paya. Tab ladki ne jawab diya ki tum ek ring to dhoond nahi paye mere liye or jaan dene ki baat karte ho.

Ye keh kar ladki wahan se chali gayi ye sochte hue ki chalo is bahane se ab wo aage kabhi mujhe propose nahi karega. Udhar ladka kafi dukhi tha lekin usne himmat nahi hari aur wo lagataar us ladki se kehta raha ki mai tumse bahut pyaar karta hu, mai tumhare bina jee nahi sakta. Please mujhe ek aur mauka de do. Ladki uske yun roz roz peeche padne se dukhi ho chuki thi aur isliye use ladke se kaha theek hai mai tumhe ek mauka deti hoon. Lekin meri ek shart hai, ladke ne poocha kya shart hai. Ladki ne kaha ki kal subah hote hi mai kahi chup jaungi aur agar kal saam 5:00 baje tak tum mujhe kahin se bhi dhoond nikalte ho to mai tumse shaadi kar lungi, lekin agar tum mujhe nahi dhoond paye to mujhe humesha ke liye bhool jana.

Ladke ke liye ye shart manna mushkil to tha lekin uske paas or koi doosra rasta bhi nahi tha to usne ladki ki shart maan li. Ladki wahan se chali gayi or apni ek friend ke ghar pahuchi or usse sab baat batayi, uski friend to un dono ko janti hi thi to isliye usne kaha ki mujhe lagta hai ki wo tumhe kal saam tak dhoond nikalega, wo tumse saccha pyaar karta hai. Ladki ne kaha wo aisa nahin kar payega kyuki wo sab jagah dhoondega lekin apne ghar me nahin dhoondega or ladki ne yahi kiya wo agle din us ladke ke ghar ke store room me jakar chup gayi. Ladka bhi shart ke mutabik use dhoondne laga. Ladke ke ghar ke store room me ek choti khidki thi jahan se uske ghar ke andar dikahyi deta tha or us khidki ke bagal me telephone bhi rakha hua tha, ladki ne dekha ki ladke ki maa bimar hain or uske pitaji unke sir par gili pattiyaan laga rahein hai.

Aur phir dophar ke time ladke ke papa ne ladke ko phone kiya or kaha beta tum kahan ho ? tumhari maa ki tabiyat theek nahi hai, tum unke liye kuch dawa le aao par ladke ne kaha papa aaj mai thoda busy hoon mai late ho jaunga to please aap khud hi le aaiye. Ladke ki maa ki tabiyat or bhi kharab hone lagi to uske papa uski maa ko lekar doctor ke paas chale gaye. Ab saam ke 4:30 baj chuke the aur ladki soch rahi thi ki bas thoda samay aur phir mera us ladke se hamesha ke liye peecha choot jayega. Aur dusri taraf kyuki ladke ke paas ab kafi kam samay bacha tha apne pyaar ko pane ka to wo pagalon ki tarah ladki ko dhoondne laga.

Tabhi phone ki ghanti baji, kyuki phone khidki k paas hi tha to ladki ne hath daal kar phone pickup kar liya. Udhar se ek ladies ki awaj aayi usne kaha ki mai xyz hospital se bol rahi hoon aapke bete ka accident ho gaya hai or wo kafi serious hai, aap please jaldi hospital pahuch jaiye. Ye sunte hi ladki ki aankhon me aansu aa gaye or wo turant waha se hospital ke liye chal di. Jab ladki hospital pahuchi to usne dekha ki wo ladka bahut hi buri tarah se injured ho gaya tha or use ICU me rakha gaya tha.

Ladki ne doctor ko bataya ki wo uski friend hai or usse milna chahti hai. Ladki ne doctor se request ki or doctor ne kaha theek hai tum usse mil sakti ho wo hosh me hai lekin use jyada paresaan mat karna. Ladki ne haan me sir hilaya or room ke ander gayi, ladki ki aankhon me aansu the or wo ladke ke bagal me jaa kar baith gayi or uska hath pakad kar rone lagi.

Tabhi ladke ne apni aankhein kholi jo ki badi mushkil se khul rahi thi or ghadi ki taraf dekh kar ishara kiya. Ghadi me abhi 5 bajne me ek minute baaki tha. Ladki ye dekh kar foot foot kar rone lagi use samajh aa gaya tha ki use isse jyada or koi pyar nahi kar sakta. Ladki ne ladke ko apni bahon me bhar liya aur kaha "I Love You". Please jaldi theek ho jao. Aur ladke ne dheere se muskaan bhari. Kuch dino baad ladka theek ho gaya aur phir dono ne aapas me shaadi kar li aur khushi khushi rehne lage.
Saccha pyar kabhi na kabhi mil hi jata hai.